足底筋膜炎同揀鞋有關:鞋底瑕疵引致腳痛[揀鞋重點]
最近《專職醫療復康中心》遇到一位病人,佢前排買咗對知名品牌嘅波鞋。一開始著嗰陣,佢覺得舒服到不得了,以為買到寶,點知著著吓,右腳開始莫名其妙咁痛起來。
一開始佢都以為係自己隻腳骨骼或肌肉出了問題,痛咗一陣子覺得唔對路,就過嚟搵我做檢查。
好彩當日佢算好彩,帶埋對「出事」嘅波鞋過嚟診所。我問佢:「腳痛咗幾耐?對鞋又著咗幾耐?」比對返個時間,發現兩者幾乎係同一個時間點發生——即係買咗對鞋著咗幾星期後,腳痛就開始浮現。
我覺得有點奇怪,就仔細拿對波鞋起來研究下。你哋可以睇睇下面條片段:我用手輕輕去搖右邊對鞋,隻鞋竟然搖下搖下,完全不穩;但試搖左邊對鞋,卻係四平八穩。
一切謎底瞬間解開!
佢右腳會痛,根本原因就係右邊鞋底底盤根本唔平!當佢平時行路或者站立嗰陣,佢右腳的肌肉同關節要額外花好大力氣去保持平衡。日積月累之下,腳部肌肉同關節過度疲勞同受壓,適應唔到,最終引發疼痛。
佢當初仲以為係自己隻腳唔好,將鞋底「著到凹凸不平」。後來佢去門市拎返同一個型號嘅鞋再做測試,點知發現原來同款鞋全部右邊鞋底都有搖晃問題!這證明根本唔係佢腳有事,而係該批次出廠時嘅品控瑕疵。
所以大家買波鞋時,真係要睇真啲、試真啲,唔好以為大牌子就一定萬無一失!
溫馨提示:揀鞋試鞋一定要注意嘅細節
遇到呢類個案,很多時客人都會問我:「平日買鞋點樣先唔會踩雷?」我整理咗幾個重點,大家買鞋時可以留意:
推一推、搖一搖:買鞋唔好只睇外觀或放喺地上睇。試鞋前,將兩隻鞋放喺平整桌面,輕輕推一推、搖一搖鞋底,確保左右兩隻都四平八穩,冇出現不尋常嘅傾斜或搖晃。
鞋底中底(Midsole)剛性:好的波鞋中底需要適度的承托力,如果鞋身太軟,一扭就擰麻花咁,行路時足部距下關節(subtalar joint)容易出現過度旋前(over-pronation),引致足底筋膜過度拉扯,甚至連帶小腿、膝關節出現不必要的力線偏歪。
配合個人腳形:每個人的足弓高低同腳形都唔同(例如有冇扁平足、寬扁足Pronated feet等)。就算同一個牌子、同一個尺碼,不同型號的鞋楦(last)同鞋底構造都有好大分別,千萬唔好以為「之前著開呢個牌子,買同牌子其他型號就一定冇事」。
買鞋雖然係生活小事,但鞋底小小嘅偏差,日積月累就會變成足底筋膜炎、跟腱炎或者關節痛症。大家買新鞋時一定要睇清睇楚,試穿時如果有任何不適,切忌夾硬著!
足底痛、足底筋膜炎困擾?
懷疑步態或鞋款引致腳痛?
《專職醫療復康中心》提供足部檢查、步態力學評估,合適可配矯形鞋墊,處理足底筋膜炎、扁平足等痛症。

